gerontiey

Category:

Акафист преп. Илариону Кавказскому


АКАФИСТЪ

Преподобному Отцу нашему          

Иларiону Кавказскому

Автору книги «На горах Кавказа». Его же память: 

Рождество 27 декабря (1848). Кончина 1 марта 

1916.

Выпускъ 2-й.


Кондакъ 1                                                                                                                                             

Избранный Богомъ быти орудiемъ испытанiя вселенней, / предреченнаго Тайнозрителемъ Iоанномъ Богословомъ, / посланного  испытати всехъ живущихъ на земле   / на любовь къ Сладчайшему Имени Iисуса, / вкупе со Iоанномъ Кронштадтскимъ Иларiоне богодухновенно рекъ:  / Имя Божiе, есть Самъ Богъ. / Якоже рече Господь Вседержитель: / «Азъ Господь Богъ, сiе Мое есть Имя вечное»,  /  Имя Господа – Самъ Господь Духъ везде сый и вся исполняяй; / имя Богоматери – Богомати; / имя Ангела – Ангелъ, Святаго – Святый.  / Сiе Православное богословiе прiемлемъ и лобызаемъ, / и отъ умиленнаго сердца нашего взываемъ ти: / Радуйся, Иларiоне, новый исповедниче и молитвенниче о душахъ нашихъ. 


I к о с ъ  1

Любовiю ко Господу облекшись, оставилъ мiръ и яже въ мiре, любителю Iисусовъ Иларiоне, святые обители Россiйскiя обтеклъ еси, взыскуя душе единаго напотребу, и достигъ еси Святыя Горы Афонскiя, и тамо во иноческiй образъ облекшися, подвизался еси въ посте, молитве и  послушанiи. Ублажаемъ святое желанiе твое спасти душу свою, и съ любовiю приносимъ ти сiя похвалы:

Радуйся, отрекшiйся отъ мiра, ради Небеснаго Райскаго блаженства; 

Радуйся, Христа Бога пресладкаго паче всего мiра возлюбивый; 

Радуйся, яко Бога ради возложилъ еси на себя иго иноческаго житiя; 

Радуйся, всемъ сердцемъ твоимъ возлюбивый Господа Бога; 

Радуйся, Боголюбче, ни во что вменивый вся красная мiра сего; 

Радуйся, пустыннолюбче, мiрскихъ сладостей отрекшiйся Христа ради; 

Радуйся, сладкоуханный крине, облагоухавшiй пустыни кавказскiя; 

Радуйся, яко зренiемъ горныхъ красотъ Кавказа утвердилъ еси веру въ Творца мiровъ; 

Радуйся, яко преобиделъ еси мiръ любленiемъ Сладчайшаго Iисуса;

Радуйся, давый образъ кротости, смиренiя и любви къ Сладчайшему Имени Iисусову; 

Радуйся, сладкопеснивый соловей воспевающiй Имя Божiе на небеси, якоже славилъ Его и на земли; 

 Радуйся, мужественный вождь земнаго ополченiя исповедниковъ въ брани за Имя Господне;

 Радуйся, Иларiоне, новый исповедниче и молитвенниче о душахъ нашихъ. 

Кондакъ 2

Видя имевшiй на тебе совершитися промыселъ Божiй, егда прiиде обитель Афонская въ расцветъ духовный, возжелаша отцы Афонстiи и на Родине создати подобную иноческую обитель, послаша строителей  созидати «Новый Афон», и съ ними тебе отче Иларiоне. Ты же съ радостiю и любовiю воспрiялъ еси жребiй той. Дивящеся таковому о тебе благоизволенiю Господа Бога, умиленно взываемъ Ему: Аллилуiа.

I к о с ъ  2

Разумея Божiе определенiе о тебе, угодниче Божiй Иларiоне, ведущiй всехъ ко спасенiю чрезъ познанiе «тайны Благочестiя» и «тайны беззаконiя», тебе, яко исполнителю воли Бога, с умиленiем взываемъ:

Радуйся, послушный слуга Господень, исполнитель воли Отца Небесного;

 Радуйся, смиренный послушниче посреде строителей Нового Афона;

Радуйся, любителю безмолвныхъ Кавказскихъ пустынь; 

Радуйся, яко стяжалъ еси молитву Iисусову непрестанную;

 Радуйся, горячiй любителю Господа Iисуса; 

 Радуйся, ничесоже любивый, паче сердечной Iисусовой молитвы; 

Радуйся, о всемъ мiре усердный молитвенниче; 

Радуйся, мудрый наставниче молитвы Iисусовой; 

Радуйся, ревностный защитниче Славы Имени Божiя; 

Радуйся, блюстителю чистоты веры и целомудрiя;

 Радуйся, смиренный исполнитель на тебе воли Господа Бога;

 Радуйся, красота собора пустынниковъ Кавказскихъ;

Радуйся, Иларiоне, новый исповедниче и молитвенниче о душахъ нашихъ. 

Кондакъ 3

 Силою благодатною свыше осеняемый, явился еси въ среде строителей Новоафонскiя обители истинный любителю Господа Iисуса, и томимый жаждою единенiя съ Господомъ, отлучался на пустынное безмолвiе, и тамо воспевалъ Богокрасную песнь: Аллилуiа.

 I к о с ъ  3

Имея Богодухновенную ревность о Славе Имени Сладчайшаго Iисуса, и горя желанiемъ соединиться съ Нимъ, уединялся еси въ безлюдные пустыни деланiя ради молитвы Iисусовой, съ нею же не разлучался еси до последняго издыханiя. Воспоминая горячую любовь твою ко Господу и великое смиренiе, ими же стяжалъ еси умносердечную молитву Iисусову, восхваляемъ тя, отче Иларiоне, принося недостойныя наши похвалы: 

Радуйся, яко ревностнымъ горенiемъ и любленiемъ Iисуса Сладчайшаго возвысился еси до небесныхъ высотъ Райскихъ; 

Радуйся, неустанный труженикъ на ниве умно-сердечного деланiя; 

Радуйся, дивный пустыннолюбче неизменный; 

Радуйся, прекрасный садоделателю нивы Христовы; 

Радуйся, пустынные труды и лишенiя любве ради Христовой претерпевый; 

Радуйся, яко горелъ еси любовiю къ Богу и ближнимъ; 

Радуйся, смиренный и терпеливый подвижниче благочестiя; 

Радуйся,  яко лучъ света Божественнаго въ нощи греховней людямъ возсiявый;  

Радуйся, всему мiру образъ кротости, любви и терпенiя подавый; 

Радуйся, прогонителю демоновъ Именемъ Iисусовымъ; 

Радуйся, гласъ Божiй прiемый въ сердце своемъ прославляти Имя Господне; 

Радуйся, верный любителю и послушниче Царя Небеснаго; 

Радуйся, возлюбленный Богомъ исповедниче пресладкаго Имени Его;

Радуйся, присный съ Богомъ молитвою собеседниче;

Радуйся, яко готовъ былъ умереть за честь и славу Имени Господа Iисуса; 

Радуйся, Иларiоне, новый исповедниче и молитвенниче о душахъ нашихъ. 

Кондакъ 4

Бури житейскихъ наважденiй избеглъ еси преподобне Иларiоне, возлюбивъ пустынное житiе, иго Христовыъ заповедей нося на рамехъ своихъ, изнуренiемъ плоти твоея и подвигомъ непрестанной молитвы Iисусовой утомилъ еси томящаго тя дiавола; трепещетъ бо сатана и трясется не терпя опаляющей Божественной силы Имени Iисусъ Христова.  И сего ради, отче, всемъ сердцемъ воспевалъ Богу: Аллилуiа

I к о с ъ  4

Тако возлюбил еси пустынное житiе безмолвное, яко, по устройству обители Новоафонскiя удалился еси в далекiя дебри Кавказа, изнуряя плоть, обходил еси пустынные горы и леса,  пламенея любовiю к Богу, восходя отъ силы  въ силу, и на земли пребывалъ,  яко ангелъ безплотенъ на небеси, побеждая Именемъ Iисусовымъ наважденiя и козни бесовскiе. Мы же, воспоминая труды и подвиги твоя, Царствiя ради Небеснаго, съ умиленiемъ приносимъ ти похвалы сiя:

Радуйся, великiй подвижниче, столпъ правоверiя и благочестiя; 

Радуйся, Церкви Христовой лампада неугасимая истинной молитвы;

Радуйся, любителю пустыннаго безмолвiя; 

Радуйся, учителю смиренiя, терпенiя и послушанiя. 

Радуйся, истинный наставниче покаянной молитвы Iисусовой; 

Радуйся, путеводителю въ горнiе обители; 

Радуйся, подражателю въ подвигахъ благочестiя святымъ отцамъ Церкви Христовой;

Радуйся, наставниче духовныхъ чадъ твоихъ на путь спасенiя; 

Радуйся, со строгостiю и смиренiе въ себе совокупивый; 

Радуйся, никого же обидевый, ниже соблазнивый подвижниче Христовъ; 

Радуйся, любителю и делателю непрестанной умно-сердечной молитвы Iисусовой; 

Радуйся, провозвестниче спасительности Имени Iисусова; 

Радуйся, яко книга твоя «На горах Кавказа», по реченiю Цензуры Духовной, «написана писаломъ любви Отчей»; 

Радуйся, Иларiоне, новый исповедниче и молитвенниче о душахъ нашихъ. 

Кондакъ 5

Благодатiю Святаго Духа руководимый, прославленiя ради Сладчайшаго Имени Iисусова, обрелъ еси Иларiоне многiя ученики: жаждущия научая непрестанной молитве Iисусовой, творити ю во смиренiи и покаянiи о гресехъ своихъ. Они же съ радостiю и любовiю прiявъ святые  наставленiя твоя, воспевали песнь Богу: Аллилуiа.

I к о с ъ  5

Видевше дiаволъ ревность твою о Славе Имени Божiя,  воздвигъ лютое гоненiе на тя чрезъ сотрудниковъ своихъ имяборцевъ, оклеветавшихъ истинное православное ученiе твое о Славе Имени Бога, аки бы о четыре ипостаси Божества. Мы же удивляяся великому терпенiю твоему и твердости въ заповеданной Богомъ вере твоей во Имя Его,  песненно восхваляемъ тя:

Радуйся, великiй столпъ исповедничества; 

Радуйся, хранителю истинной веры Православной во Имя Божiе; 

Радуйся, кознями вражiими непобедимый исповедникъ истинного Православiя въ Имяславiи; 

Радуйся, обличителю имяборческаго нечестiя;

Радуйся, яко въ книзе «На горахъ Кавказа» ревностно прославилъ еси Имя Господне; 

 Радуйся, яко книга твоя обличила нечестiе имяборческаго духовенства последняго времени; 

Радуйся, богомудрый обличителю имяборчества iерархiи; 

Радуйся, яко книга твоя служитъ вернымъ христiанамъ компасомъ и пищею духовною; 

Радуйся, яко книга твоя любителямъ молитвы Iисусовой служитъ незаблуднымъ руководствомъ;

Радуйся, яко книга твоя содержитъ Откровенiе Божiе истиннаго пути ко спасенiю;

Радуйся, яко книга твоя избрала соль мiра – исповедниковъ Имени Божiя, хранящихъ чистоту Православiя; 

 Радуйся, богоглагольниче, словомъ Божiимъ обуздавый хульныя уста имяборцевъ;

 Радуйся, прозорливый предсказателю грядущаго гнева Божiя на Россiю и церковь за похуленiе Имени Божiя Ангелами церкви – Синодомъ и патрiархами; 

 Радуйся, предзревый въ имяборной ереси приближенiе Дня Суднаго;

Радуйся, Иларiоне, новый исповедниче и молитвенниче о душахъ нашихъ. 

Кондакъ 6

Проповедникъ изрядный явился еси на последокъ временъ, Славы и Божества Имени Божiя, похуленнаго имяборцами, и сего ради отъ нихъ возненавиденный и оклеветанный, Богомъ же прославленный чудесами, отъ Него же и венецъ исповедническiй воспрiялъ еси, и по кончине своей избегл еси мытарствъ демоновъ,  молитва Iисусова яко свеча шла предъ тобою, и тако ты, отче Иларiоне, достигъ и поклонился Господу на Престоле славы седящему,  и воспелъ Ему Богокрасную песнь: Аллилуiа.

I к о с ъ  6

Возсiя паки в Россiи Слава Пребожественнаго Имени Бога,  книги ради «На горахъ Кавказа», забытая въ последняя времена,  сiю же напомнили мiру: яркiй светильникъ Церкви Христовой Iоаннъ Кронштадтскiй и с ним ты отче Иларiоне, да возродится въ Христiанстве вера, благочестiе и древнее Имяславiе. Слуги же и предтечи антихристовы – имяборные архiереи запретиша чадамъ церковнымъ прославляти Имя Господне. Мы же, имяславцы, радуемся святоотеческому ученiею вашему, и взываемъ:

Радуйтеся, Иларiоне, вкупе со Iоанномъ Кронштадтскимъ, истинные служители Славы Царя Небеснаго;  

Радуйтеся, со всеми Святыми славители Имени Бога Вышняго; 

Радуйся, Иларiоне, неутомимый труженикъ въ прославленiи Имени Господня;  

Радуйся, смелый обличителю отступленiя отъ Православiя высшего духовенства похулившаго Имя Божiе,  по предсказанiю Священнго Писанiя; 

Радуйся, открывшiй многимъ истинный путь ко спасенiю; 

Радуйся, наставниче храненiя памяти смертной;

Радуйся, непрелестный учителю молитвы Iисусовой; 

Радуйся, земный ангелъ и небесный человече;    

Радуйся, собеседниче Ангеловъ и друже Христовъ верный; 

Радуйся, уготовившiй сердце свое въ обитель Пресвятыя Троицы; 

Радуйся, Именемъ Iисусовымъ вселивый въ сердце свое Господа Iисуса; 

Радуйся, учителю истинного богословiя; 

Радуйся, обличителю суемудраго богословiя имяборческаго; 

Радуйся, провозвестниче правды Имеславiя и осрамителю неправды имяборчества;

Радуйся дерзновенный обличителю хулителей Имени Божiя; 

Радуйся, Духомъ Святымъ открывшiй избранникамъ путь истины на последокъ временъ; 

Радуйся, указатель пути шествующимъ въ Горнiй Iерусалимъ;

Радуйся, Иларiоне, новый исповедниче и молитвенниче о душахъ нашихъ. 

Кондакъ 7

Хотя сокровенную тайну открыти Отецъ Небесный послалъ Сына Своего возлюбленнаго въ мiръ спасти родъ человеческiй и явить мiру Трисвятое Имя Свое еже есть Таинство Пресвятыя Троицы,  Троичное Божество Отца и Сына и Святаго Духа.  Въ исповеданiи Именъ Пресвятыя Троицы суть «Тайна Благочестiя»  якоже учитъ святый Григорiй Нисскiй, въ похуленiи же Именъ Бога – «тайна беззаконiя».  Сего ради, благодарственную поемъ Трiединому Богу песнь: Аллилуiа.

I к о с ъ  7

Дивную любовь Свою явилъ Господь Богъ къ падшему роду человеческому, открывъ Трисвятое Имя Своего Божества. Въ последняя же времена, отступившiе отъ «Тайны Благочестiя» имяборцы похулиша Пребожественное Троичное Имя Бога и отвергоша Его бытiе. Ты же, велiй исповедниче Иларiоне, изобличилъ еси беззаконiе архiереевъ имяборцевъ, подобное беззаконiю архiереевъ iудейскихъ, распявшихъ Христа Спасителя. Сего ради ублажаемъ тя и взываемъ:

Радуйся, неугасаемая свеща молитвенно къ Богу горящая; 

Радуйся, зарница духовная, просвещающая неверныхъ смыслы; 

Радуйся, мужественный исповедниче Имени Христова; 

Радуйся, непреоборимый защитниче Славы Имени Iисусова; 

Радуйся, споспешниче Михаилу Архангелу в брани со вратами ада за Имя и Славу Владыки небесе и земли; 

Радуйся, буiихъ имяборцевъ осрамителю, иже обломаша зубы своя о твое истинное богословiе;

Радуйся, неколеблемый столпъ истиннаго Православiя; 

Радуйся, красота Церкви Христовой последняго времени; 

Радуйся, несломленный угрозами синодаловъ исповедникъ Божества Именъ Пресвятыя Троицы;   

Радуйся, крепкiй, яко же адамант, исповедникъ веры Христовой; 

Радуйся, яко въ Горнем Iерусалиме со Ангелы  и всеми Святыми прославляеши Имя Пресвятыя Троицы;  

Радуйся, исповедниче и продолжателю Небеснаго Имяславiя; 

 Радуйся, краса Кавказскихъ пустынь, освятившiй ихъ молитвою Iисусовой; 

 Радуйся, обвеселившiй исповедниковъ Имени Христова;

Радуйся, Иларiоне, новый исповедниче и молитвенниче о душахъ нашихъ. 

Кондакъ 8

Странно видети архiереевъ Россiйстей церкви восхулившихъ Святейшее Имя Божiе, обругавшихъ Сладчайшее Имя Iисусово, еже паче всякаго имене,  яко держитъ весь мiръ,  Имъ же вернiи спасаются,  а хулящiе Его погибаютъ.  Ты же, любимый наставниче нашъ, отче Иларiоне, поведалъ еси последнимъ христiанамъ путь спасенiя въ исповеданiи и прославленiи пресвятаго Имени Божiя,  Его же прославляя поемъ Богу: Аллилуiа.


I к о с ъ  8

Весь Богу предался еси, и Господь тобою напомнилъ мiру церковное почитанiе Имени Своего, его же на Небеси славятъ Ангели, а на земли, верные христiане;  сiе Небесное и земное Имяславiе ты, отче Иларiоне, возвестилъ намъ грешнымъ, да хранимъ его до скончанiя века. Посему, прiими отъ насъ грешныхъ и недостойныхъ благодарственные песни сiя:  

Радуйся, ничесоже возлюбивый на земли, паче Славы Имени Божiя;

Радуйся всемъ сердцемъ и душею возлюбивый Господа Iисуса; 

Радуйся, терпенiемъ  земныхъ скорбей, наслажденiя красотами обителей Царя Небеснаго сподобивыйся; 

Радуйся, умъ вперивый въ созерцанiе  непреходящихъ красотъ райскихъ; 

Радуйся, яко терпелъ еси на земли уничиженiя и гоненiя отъ имяборныхъ архiереевъ, ныне же вкушаеши небесныя радости; 

Радуйся, обоженiя непрестанной молитвою Iисусовой сподобивыйся; 

Радуйся, духовная свирель и сладкогласная цевнице Славы Имени Пресвятыя Троицы; 

Радуйся, отче, и мы радуемся, яко со Ангелы и Святыми прославляеши Имя Господне;

Радуйся, проповедниче правды и обличителю неправды; 

Радуйся, земный и небесный имяславецъ, обличившiй имяборчество ХХ-го века; 

Радуйся, яко и по сей день звучитъ строгое обличенiе твое имяборцамъ, отступившимъ отъ истиннаго Православiя; 

 Радуйся, необоримый исповедниче истинной Веры Христовой;  

 Радуйся, денница светозарная, осветившая путь къ Богу имяславцамъ; 

Радуйся, усердный молитвенниче объ исповедникахъ Имени Божiя;

Радуйся, Иларiоне, новый исповедниче и молитвенниче о душахъ нашихъ. 

Кондакъ 9

Все естество Ангельское, – якоже поетъ Церковь Христова въ Акафисте Iисусу Сладчайшему, –  безпрестанно славитъ Пресвятое Имя Твое, Iисусе, на небеси, Святъ, Святъ, Святъ вопiюще. Мы же грешнiи на земли бренными  устнами вопiемъ: Аллилуiа. 

I к о с ъ  9

Витiйствующiи имяборцы неразумеютъ: како Имя Божiе суть Самъ Богъ, и хульные речи баснословятъ: яко Имя Божiе не Богъ а вымыселъ человеческiй. Сiе дiавольское хуленiе, ты, отче,  укрепляемый Божiей Благодатiю въ заповеданной Отцемъ Небеснымъ вере во Имя Сына Его Iисуса Христа,  ничтоже сумняшеся, отверглъ еси, яко хулу на Самого Бога.  Сего ради, восхваляя ревность твою о Славе Имени Бога, подобную ревности Илiи пророка, взываемъ ти:  

Радуйся, яко со всякимъ дыханiемъ славилъ еси Имя Iисусово, еже паче всякаго имене;  

Радуйся, всемъ показавый, яко спасенiе наше въ семъ Имени Iисусове ;

Радуйся, ревностный хранителю чистоты Православiя; 

Радуйся, столпъ Святоотеческаго исповедничества;

Радуйся, подражателю ревности пророка Илiи о Славе Имени Бога;

Радуйся, исповедниче Славы Имени Господня, отразивый хульное суесловiе имяборческое; 

Радуйся, яко на хитрословесiе имяборческое не соизволивый; 

Радуйся, яко въ хуленiи Имени Бога узрелъ еси знаменiе последнихъ временъ; 

Радуйся, пророчески гневъ Божiй на Россiю и церковь ея за имяборчество предсказавый; 

Радуйся, близкiй Судъ Божiй за хулу на Имя Господне предрекшiй; 

Радуйся, предвидевшiй гибель Россiи, аще не прославитъ похуленное имяборцами Имя Господне; 

Радуйся, Богоизбранный защитниче Славы Имени Пресвятыя Троицы; 

Радуйся, Иларiоне, новый чудотворче и молитвенниче о душахъ нашихъ.

Кондакъ 10

Спасти хотя остатокъ христiаъ и послати искушенiе на вселенную испытати живущихъ на земле; для сего избралъ Богъ два сосуда Благодати Своея: святаго Iоанна Кронштадтскаго и преподобнаго Иларiона Кавказскаго, дабы напомнили мiру забытое ныне древнее Имяславiе Небесной Торжествующей и земной воинствующей единой Церкви Христовой. Таковому Всеблагому Промыслу Премудраго Спасителя нашего поклоняемся и воспеваемъ Богу: Аллилуiа.

 I к о с ъ  10

Царю превечный, Утешителю Христе истинный, помоги намъ грешнымъ и недостойнымъ рабомъ Твоимъ, не могущимъ принести достойную похвалу великому угоднику Твоему; отъ всей души и всего сердца нашего, веруемъ и исповедуемъ, яко дивенъ Ты, Боже, во святыхъ Своихъ и во избраннике Твоемъ Иларiоне, и сего ради, вспомоществуемые Твоею Благодатiю, приносимъ ему похвалы сiя:  

Радуйся, сосудъ благодати Богомъ избранный; 

Радуйся, исполнителю Божiего определенiя; 

Радуйся, скорби и гоненiя претерпевый за Имя Господне, по предреченiю Iисуса;  

Радуйся, избранниче Божiй, со Святыми исповедниками, наследниче Небеснаго Царствiя;

Радуйся, подражателю Святымъ исповедникамъ; 

Радуйся, чудотворче Кавказскiй, предивный; 

Радуйся, усердный молитвенникъ предъ Богомъ за соблюдающихъ правоверiе въ чистоте; 

Радуйся, отче, вознесимый свои горячiе молитвы за ны у престола Господа Вседержителя; 

 Радуйся, покорный служителю Божiего промысла; 

 Радуйся, охранителю исповедниковъ Имени Божiя отъ печати антихриста; 

Радуйся, соблюдающiй имяславцев отъ вероотступническаго экуменического сборища сатаны;        

 Радуйся, непобедимый воинъ Христов  в  духовной брани со вратами ада – имяборцами;

Радуйся, Иларiоне, новый исповедниче и молитвенниче о душахъ нашихъ. 

Кондакъ 11

Пенiе всеумиленное приносимъ ти, отче Иларiоне,  благодарные духовные чада твоя; славимъ Господа Бога даровавшаго намъ тебя, усерднаго молитвенника и заступника предъ Богомъ за насъ грешныхъ и недостойныхъ исповедниковъ Славы и Божества Его Пресвятаго Имени, и со умиленiемъ поемъ Ему: Аллилуiа.

 I к о с ъ  11

Светоподательна светильника и заступника сущимъ намъ во тьме неразумiя послалъ Господь, тебя отче Иларiоне, ревнителя подобного Илiи пророка, яко и ты, ревнуя, поревновалъ еси о Славе Имени Бога. Сего ради, радостно и съ любовiю почитая ревность твою о Славе Божiей восхваляемъ тя звнiи сими:  

Радуйся, яко на Афоне подвизавыйся и въ пустыню Кавказа преселивыйся;  

Радуйся, яко по мольбамъ учениковъ твоихъ, и внушенiю отъ Пресвятой Девы Марiи, въ лесныхъ дебряхъ Кавказа написавый книгу о молитве Iисусовой, въ ней же прославися Имя Господне; 

Радуйся, яко сей трудъ твой, определенiемъ Бога послужилъ испытанiемъ вселенной, на веру во Имя Божiе; 

Радуйся, яко книга сiя определила верныхъ и неверныхъ въ роде христiанскомъ, на кончине вековъ;

Радуйся, яко книга твоя незаблудная наставница ко спасенiю; 

Радуйся, яко книга твоя – медоточный сотъ, услаждающiй верныхъ чадъ Церкви Христовой сладостiю духовной;

Радуйся, неукоснительный последователь въ ученiи объ Имени Божiемъ Святымъ Отцамъ и всемiрному Чудотворцу Iоанну Кронштадтскому; 

Радуйся, яко до конца устоялъ еси въ ветхозаветномъ пророческомъ и новозаветномъ апостольскомъ Имяславiи; 

Радуйся, истинный, самоотверженный исполнитель воли Божiей; 

Радуйся, имяборческой ереси благодатный искоренителю;

Радуйся, яко истинный еси православный христiанинъ пребылъ до кончины своея; 

Радуйся, небесная труба велегласная, возвестившая  приближенiе Дня Суднаго;

Радуйся, Иларiоне, новый исповедниче и молитвенниче о душахъ нашихъ. 

Кондакъ 12

Благодать Божiя, избравшая тя отче, Иларiоне, послужити промыслу Божiю испытати вселенную, внушила тебе изрещи пророчество о позоре имяборцамъ отъ грядущихъ поколенiй монаховъ и мiрянъ, за безчестiе  Пресвятейшаго Имени Бога, за осужденiе книги «На горахъ Кавказа», неправедно сожженной имяборцами. Сего ради завещалъ еси по кончине своея книгу  положити на бездыханную грудь твою, въ уверенiе ея правоты,  предавъ на Всеправедный Судъ Божiй дело о книге своей,  послужившей Божiимъ испытанiемъ Вселенной. Веруемъ въ Божiе милосердiе къ исповедникамъ Славы Имени Божiя, поющихъ Ему: Аллилуiа.


I к о с ъ  12

Исповедуемъ Боже, промыселъ Твой о испытанiи Вселенной  чрезъ угодника Твоего отца нашего Иларiона на наличiе истиннаго Православiя, егоже несть кроме Имяславiя; и съ помощiю Твоей Благодати приносимъ угоднику Твоему песни сiя:    

Радуйся, предобрый и прелюбимый наставниче нашъ, ко спасенiю; 

Радуйся, отче, открывшiй намъ истинный путь ведущiй въ Царствiе  Небесное, въ нощи греховней сущимъ; 

Радуйся, недугующихъ теломъ и душею целителю пресладостный; 

Радуйся, Iисусовой молитвою на земли соединивыйся съ Господом Богомъ; 

Радуйся, Божiй слуга, послужившiй промыслу Божiю въ испытанiи веры во Имя Божiе всехъ живущихъ на земле;   

Радуйся, любимый нашъ старче, усердный о нас молитвенниче;   

Радуйся, кавказскихъ пустынь прекрасная похвало; 

Радуйся, красоту кавказскихъ пустынь созерцавый и описавый; 

Радуйся, яко мудро преждевременное пустынножительство новоначальнымъ возбранялъ еси; 

Радуйся, всемiрный исповедниче Славы Имени Божiя; 

Радуйся, усердный молитвенниче о исповедникахъ, славящихъ Имя Господне; 

Радуйся, грозный обличителю имяборствующих; 

Радуйся, Иларiоне, новый исповедниче и молитвенниче о душахъ нашихъ. 


Кондакъ 13

О, великiй угодниче Божiй Иларiоне, усердный молитвенниче о  прославляющихъ Имя Господне! Съ верою и любовiю почитаем святую память и ревность твою о Славе Имени Божiя, молитвенные подвиги твои пустынные, и молим тя: прiими слабое и недостойное наше песнословiе твоей святости, отъ скудости ума нашего, но и отъ усердiя приносимое тебе; коленопреклоненно молимъ Тя, отче Иларiоне: молися усердно ко Пресвятей Троице о насъ, духовныхъ чадахъ твоихъ, да даруетъ намъ духъ смиренiя, духъ покаянiя, духъ любви, память смертную и непрестанную молитву, поющимъ Богу: Аллилуiа. 

         (Сей Кондакъ глаголемъ трижды. Затемъ, Iкосъ 1-й, и Кондакъ 1-й





Молитва.

 О Пресладкiй и Всещедрый Господи Iисусе Христе, Спасителю нашъ! Преклоняемъ во смиренiи колена душъ и сердецъ нашихъ предъ Твоимъ Божественнымъ Величiемъ и молимъ Твою безмерную благость: помилуй насъ грешныхъ, прости безчисленные грехи наши, молитвами Пресвятой Богородицы, Святыхъ небесныхъ силъ безплотныхъ, преподобнаго и богоноснаго отца нашего Иларiона, и всехъ Святыхъ от века благоугодившихъ Тебе, – буди милостивъ намъ грешнымъ!

 И тебя, великiй угодниче Божiй, отче Иларiоне, дерзновенный предстатель нашъ предъ Господомъ, смиренно и со слезами молимъ тя, твои духовные чада: твоими святыми молитвами у Престола Бога въ Троице славимаго и поклоняемаго, за Его же Имя подвизался еси до кончины своея, сохрани насъ, слабыхъ, унылыхъ, немощныхъ, нерадивыхъ, многогрешныхъ отъ лукавыхъ сетей вражiихъ и печати антихриста; помоги намъ до кончины нашей соблюсти правое и спасительное веры исповеданiе. Ты, святый отче, съ ревностiю Илiи подвизался еси за честь и Славу Имени Божiя, за Его же Божество и гоненiе претерпелъ еси отъ  хулителей  Имени Господня, иже убивая исповедниковъ за Имя Божiе, мнили темъ службу Богу приносятъ, и на всехъ славящихъ Пресвятое Имя Его воздвигли лютое гоненiе, – гнали и убивали, за то Имя, которое «паче всякаго имене»,  Емуже «всякое колено поклоняется небесныхъ, земныхъ и преисподнихъ»;  Имъ же изгоняются бесы и все нечистое;  въ исповеданiи Именъ Пресвятой Троицы, благочестiя возсiяваетъ светъ и просвещаетъ всякаго человека въ мiръ грядущаго;  святый же Iоанн Лествичникъ учитъ: «бiй супостатовъ Именемъ Iисусовымъ, крепчайшаго оружiя не обрящеши ни на небеси, ни на земли».  Сiе дражайшее Имя «Iисусъ», предуготовано въ Предвечномъ Тройческомъ Совете на наше избавленiе, и явленiемъ  Своимъ «якоже Солнце мiръ облеста,  и яко мvро благовонное вселенную облагоуха»; «О, коль есть сладко Имя «Iисусъ», рабу и узнику въ любовь Его плененну!»  восклицаетъ Златоустъ Россiйскiй Димитрiй Ростовскiй.

 О, предивный исповедниче, отче Иларiоне! настави насъ на путь покаянiя, смиренiя, терпенiя, благочестiя; всели въ насъ память смертную и укрепи въ истинной вере, надежде и любви; паче же, въ сiю тяжкую годину испытанiя живущихъ на земле и плача достойное время, когда врагъ спасенiя разставилъ коварные сети на уловленiе и погубленiе верныхъ христiанъ, и черезъ слугъ своихъ, мнимыхъ пастырей, волковъ въ одежде овчей, соблазняетъ къ имяборчеству, восхулить Святейшее Имя Господне отрицанiемъ Его Божества и Божественной силы, и темъ  лишить верныхъ спасенiя, – усердно молимъ, дорогой, любимый нашъ отче Иларiоне: ты сохранилъ до конца слово терпенiя и не отрекся отъ Имени Господня,  и насъ любовiю чтущихъ святую память твою, сохрани отъ имяборной ереси, отъ поклоненiя антихристу, да сохранимъ правоверiе въ благочестiи и чистоте; и какъ здесь на земле,  такъ и въ будущемъ веке, да сподобимся вместе съ тобою и всеми Святыми славить и воспевать пречестное и великолепое Имя въ Троице славимаго Бога: Отца и Сына и Святаго Духа во веки вековъ.  Аминь.

                                                       

                                                 Величанiе


     Ублажаемъ тя, / преподобне отче Иларiоне, / и чтемъ святую память твою, / наставниче мiрскихъ и монаховъ, / и собеседниче Ангеловъ.     


Тропарь, гласъ 4:


     Пустынный житель горняя мудрствуя, / непрестанно Имя Христово въ сердце нося, / сподобился единенiя сердечнаго съ Господомъ /  молитвою Iисусовой, / юже преподалъ еси ученикомъ твоимъ, / любящимъ Iисуса Господа своего. / Тем же, отче Иларiоне молимъ тя: / научи и насъ непрестанной молитве сей, / и молися ко Господу, спастися душамъ нашимъ.


инъ Тропарь, гласъ 4:


     Яко труба велегласная, / возвестившая близость Суднаго Дне, / избранным открывшая «тайну благочестiя» / в исповеданiи Имени Пресвятыя Троицы, / «тайну же беззаконiя» в имяборчестве; / слуга Господень и ревнителю Славы Имени Божiя, / отче Иларiоне преподобне, / молитвами твоими ко Господу / сохраняй насъ в годину испытанiя живущихъ на земле, / неизглажденнымъ быти изъ книги жизни вечныя,  / славы  ради Имени Iисуса Сладчайшаго, / тобою проповеданнаго, / съ верою и любовiю почитающихъ тя. 


  Кондакъ, гласъ 6:


Тщету мiра Христа ради возненавидевъ, / въ горныхъ пустыняхъ Кавказа вселился еси, / идеже множество учениковъ собралъ еси, / поучая всехъ непрестанной Iисусовой молитве; / за Божество Имени Господня претерпевый гоненiе, / исповедниче и молитвенниче отче Иларiоне, / научи и насъ недостойныхъ  непрестанной молитве Iисусовой, / почитающихъ великiя подвиги твоя, / испроси намъ у Господа велiю милость: / соблюсти правую веру во Имя Господне, /  съ верою и любовiю прославляя Его, / и спастися душамъ нашимъ. 

инъ Кондакъ, гласъ 6:


Дивный пустынникъ Христа ради, / водрузивый въ сердце своемъ Господа молитвою Iисусовой; / сего ради Богодухновенно рекъ: / въ Имени Божiемъ Самъ Господь, / Именемъ Своимъ Богъ испыталъ вселенную. / Мы же недостойнiи, отче Иларiоне, молим тя: / твоимъ предстательствомъ у престола Святыя Троицы, / молися о насъ недостойныхъ, / сподобитися непрестанной Iисусовой молитвы, / и до кончины нашея подвизатися / за Божество спасительного Имени Iисуса Сладчайшаго, /  во еже спастися душамъ нашимъ.



      Венокъ на могилу старца Иларiона

               

Путникъ, грехомъ утомленный

Къ могиле святой подойди,

Где схимникъ – старецъ предивный

Зарытый глубко въ земли.

Проси у него – чего хочешь,

С молитвой къ нему припади

И верь, тебе онъ поможетъ:

Нужды свои ему расскажи…

Въ сей жизни онъ подвигъ суровый

Молитвенный несъ до конца,

И крестъ донесъ свой тяжелый –

Молилъ Всеблагаго Творца!

 За мiръ онъ усердно молился;

Близкiй конецъ ему предсказалъ,

Всемъ непрестанно молиться,

И каяться Богу – намъ завещалъ.

Будемъ, хранить его, мы, заветы, 

Умолять будемъ Бога-Творца:

Покоить въ селеньяхъ Небесныхъ

Любимого Старца-Отца!


Милосердный Господи, упокой  въ селенiяхъ Праведныхъ душу схимонаха Иларiона, и его святыми молитвами прости согрешенiя наша!    

Темные Буки. 12.10.2006 г.

                                                                  

        

      Слава Ему во веки!

      Аминь.






Error

default userpic
When you submit the form an invisible reCAPTCHA check will be performed.
You must follow the Privacy Policy and Google Terms of use.